Lesið í fréttaflutning

Menn virðast ansi oft falla í þá gildru að reyna að lesa í fréttaflutning fjölmiðla og komast síðan að þeirri niðurstöðu að fréttaflutningurinn sé ekki hlutlægur. Þetta gerist til dæmis oft hjá fólki sem hefur sterkar skoðanir á ákveðnum málum.

Skýrt dæmi um slíkt að mínu mati er þessi færsla Andreu Ólafsdóttur, sem er frambjóðandi fyrir vinstri græna. Þar segir hún "Fréttastofu RÚV" (dreg þá ályktun að hún sé að tala um fréttastofu Sjónvarpsins en hún ætti að vita að það eru tvær fréttastofur á RÚV) með ólíkindum hlutdræga í upprifjun sinni á stóriðju- og virkjanaatburðum ársins 2006 í fréttaannálnum. Ég varð ekki var við slíka hlutdrægni, en ég hef heldur ekki jafn sterka skoðun á þessum málum og Andrea greinilega hefur.

En rök Andreu voru semsagt þau að lítið hafi verið sýnt frá mótmælum gegn virkjunum. Meðal annars hafið lítið verið sýnt frá mótmælum við Kárahnjúka í sumar og ekkert frá mótmælagöngu Ómars Ragnarssonar. Reyndar hafa fleiri orðið til að gagnrýna það að ekkert kom um göngu Ómars í annálnum.

Rétt er að benda Andreu á það að í annál Fréttastofu Útvarpsins var gerð nokkuð ítarleg grein fyrir mótmælunum við Kárahnjúka. Hins vegar var ekki minnst á göngu Ómars, sem eftir á að hyggja hefði átt að gera. En það er alltaf erfitt að meta hvað á að sleppa inn í svona annála og hvað ekki.

Í einni athugasemdinni við færslu Andreu kom fram sú skoðun að RÚV hefði frekar verið með áróður gegn Kárahnjúkavirkjun. Þannig að fyrst fólk hefur svona álíka skoðanir á fréttaflutningi, hlýtur hann að koma öllum sjónarmiðum nokkuð vel á framfæri.

En þetta er ekki eina tilvikið sem slíkt hefur átt sér stað. Hnýtt hefur verið bæði í fréttastofur RÚV og fjölmiðla 365-miðla fyrir fréttaflutning þeirra af RÚV-frumvarpinu. Og þar hafa menn líka verið að horfa of mikið í það hvaða miðill er að flytja fréttina, en ekki hvað hann er að segja. Menn ganga hreinlega að því vísu að fjölmiðlarnir flytji fréttir sem þjóni hagsmunum þeirra best, og lesa svo fréttirnar með það í huga.

Ég held að það yrði algjörlega vonlaust fyrir RÚV og 365 að flytja fréttir af þessu máli án þess að eitthvað yrði hnýtt í fréttaflutning þeirra. Og það er af því að menn hugsa meira um hvaða fjölmiðill er að flytja fréttina og hvaða hagsmuna hann hefur að gæta að viðkomandi máli. Það er slæmt þegar menn geta ekki litið fram hjá því þegar fréttir fjölmiðlanna eru skoðaðar.